WhatsApp પર એકાઉન્ટ બનાવવા એક એક્ટિવ ફોન નંબરની જરૂર પડે છે. ખાતરી કરવામાં તમને જો કોઈ તકલીફ પડે, તો કૃપા કરીને તમે આટલું કર્યું છે કે નહિ તે તપાસી લો:

• તમે App Storeમાંથી WhatsAppનું લેટેસ્ટ વર્ઝન ડાઉનલોડ કરેલું છે.
• તમે દેશના કોડની સાથે તમારો પૂરો આંતરરાષ્ટ્રીય ફોન નંબર લખ્યો છે (અથવા દેશના લિસ્ટમાંથી તમારો દેશ પસંદ કરો).
  • ભારતના ફોન નંબરનું એક ઉદાહરણ: +91 85554 02595.
• ફોન નંબરની આગળ આવતા કોઈ પણ શૂન્યને (0) હટાવી દો.
• તમારા ફોનમાં સારી ગુણવત્તાવાળું ઇન્ટરનેટ કનેક્શન છે અને તમે તેને સંપૂર્ણ રીતે વાપરી શકો છો. ખાતરી કરવા માટે કોઈ વેબ પેજ ખોલી જુઓ.
• તમારો ફોન આંતરરાષ્ટ્રીય SMS મેળવી શકે છે.
• તમે iPod Touch કે iPad, જેના માટે સપોર્ટ ઉપલબ્ધ નથી તેવું ડિવાઇસ ન વાપરી રહ્યા હો.
• તમારું ડિવાઇસ જેલબ્રોકન (બિનસત્તાવાર) નથી.

તમારો ફોન નંબર લખ્યા પછી તેના પર SMS મળવાની રાહ જુઓ. આ મેસેજમાં 6 અંકોનો ખાતરી કોડ હશે, જેને તમે WhatsAppની ખાતરી માટેની સ્ક્રીન પર લખશો. આ ખાતરી કોડ એકમાત્ર અને અલગ હોય છે તથા તમે જયારે પણ કોઈ નવા ફોન નંબર કે ડિવાઇસની ખાતરી કરો, ત્યારે દરેક વખતે બદલાય છે. ખાતરી કોડને અનુમાનથી લખશો નહિ, નહિતર બની શકે કે તમે થોડા સમય માટે WhatsApp વાપરી ન શકો.

નોંધ: જો તમારું iCloud Keychain ચાલુ કરેલું હશે અને પહેલાં આ નંબરની તમે ખાતરી કરેલી હશે, તો બની શકે કે આપમેળે જ નવા SMS કોડ વગર ખાતરી થઈ જાય.

જો તમને SMSથી કોડ ન મળે, તો અમારી આપમેળે ચાલતી સિસ્ટમ તમને કોડ માટે કૉલ કરી શકે છે. પાંચ મિનિટનું ટાઇમર પતવાની રાહ જુઓ અને આ દરમિયાન તમારા નંબરમાં ફેરફાર કરશો નહિ. પાંચ મિનિટ પછી, મને કૉલ કરો પર દબાવો.

નોંધ: બની શકે કે કદાચ તમને SMS અને ફોન કૉલ માટે ચાર્જ લાગે, તેનો આધાર તમારા મોબાઇલ નેટવર્ક પર છે.

જો તમે આ પગલાં ભર્યાં હોય અને કોડ ન મળે, તો નીચે મુજબ કરો:

1. તમારા iPhoneમાંથી WhatsAppને અનઇન્સ્ટોલ કરો.
2. તમારો iPhone રીબૂટ કરો > તમારા iPhoneને બંધ કરીને ચાલુ કરો.
3. App Store પરથી WhatsAppનું લેટેસ્ટ વર્ઝન ડાઉનલોડ કરો.