इतर लोकांशी संवाद साधणे सोपे, सुरक्षित आणि विश्वासार्ह असावे या उद्देशाने WhatsApp निर्माण केले आहे. मेसेजिंग हे मूलभूतरीत्या खाजगी ठेवलेले आहे आणि आमच्या सेवाशर्ती अशा तयार केल्या आहेत की आमचा प्लॅटफॉर्म आणि आमचे वापरकर्ते सुरक्षित राहतील. WhatsApp जबाबदारीने कसे वापरावे हे समजून घेण्यासाठी अनेकांनी आमच्याकडे विचारणा केली आहे. आणि म्हणूनच वापरकर्त्यांना WhatsApp वापरताना उत्तम अनुभव यावा यासाठी आम्ही ही मार्गदर्शक तत्त्वे विकसित केली आहेत. WhatsApp चे सर्व वापरकर्ते, जसे की सरकारी संस्था, राजकीय पक्ष आणि राजकीय नेते या सर्वांनी सुद्धा WhatsApp वापरताना खालील नियम पाळणे आवश्यक आहे. WhatsApp वर ऑटोमेटेड पद्धतीने येणारे आणि भरपूर प्रमाणात येणारे मेसेजेस म्हणजेच बल्क मेसेजिंग कसे प्रतिबंधित करावे याविषयी हा व्हाईट पेपर जरूर वाचा.

WhatsApp वापराचे नियम

• मेसेजिंग खाजगी ठेवा : वैयक्तिक चॅट साठी आणि लहान ग्रुप चॅट साठी वापरकर्त्यांनी त्यांचे खाते स्वतःच व्यवस्थापित करणे अपेक्षित आहे.
• लोकांची परवानगी मागा : जर एखाद्या व्यक्तीने स्वतःहून तुमच्याशी संपर्क साधला असेल किंवा त्यांनी स्वतःहून तुम्ही WhatsApp द्वारे त्यांच्याशी संपर्क साधावा अशी विनंती केली असेल तर अशाच व्यक्तींना मेसेज पाठवावा. लोकांनी प्रथम त्यांच्यातर्फे तुम्हाला मेसेज करावा यासाठी तुम्ही तुमचा फोन नंबर देणे उत्तम ठरेल. जर कोणी तुम्हाला त्यांचा फोन नंबर दिला असेल तर त्यांच्या अपेक्षेप्रमाणे त्यांना मेसेज करावा. जसे की, प्रथम तुम्ही कोण आहात आणि त्यांचा फोन नंबर तुमच्याकडे कसा आला हे त्यांना सांगा.
• लोकांच्या इच्छेचा आदर करा : जर एखाद्या वापरकर्त्याने त्यांना मेसेज पाठवू नये असे सांगितले असेल तर त्यांना तुम्ही तुमच्या ॲड्रेस बुक मधून काढून टाकावे आणि त्यांना परत संपर्क साधण्याचा प्रयत्न करू नये. तुम्ही एखाद्याला ग्रुप मध्ये जोडण्यापूर्वी त्यांची परवानगी मिळवणे आवश्यक आहे. जर तुम्ही एखाद्याला ग्रुप मध्ये सामील केले आणि ते स्वतःहून त्या ग्रुपमधून बाहेर पडले तर त्यांच्या निर्णयाचा आदर करा.
• ग्रुप नियंत्रणे वापरा : आम्ही WhatsApp ग्रुपसाठी ॲडमीनच केवळ संदेश पाठवू शकतील हे सेटिंग विकसित केले आहे. जर तुम्ही ॲडमीन असाल तर तुम्ही हे ठरवू शकता की सर्व सहभागी सदस्य किंवा केवळ ग्रुप ॲडमीनच ग्रुप वरती संदेश पाठवू शकतात. हे फीचर वापरल्याने ग्रुप मध्ये येणारे नकोसे मेसेजेस बंद होण्यास मदत होते.
• फॉरवर्ड करण्यापूर्वी दोन वेळा विचार करा : प्रत्येक फॉरवर्ड होणाऱ्या मेसेजला आम्ही लेबल लावतो जेणेकरून शेअर करताना लोक एकदा विचार करतील.

हे करू नका

• नकोसे, ऑटोमेटेड आणि भरपूर मेसेजेस पाठविणे : WhatsApp वरून भरपूर मेसेजेस, ऑटोमेटेड मेसेजेस पाठविणे आणि ऑटो डायल करण्याचा प्रयत्न करू नका. WhatsApp हे मशीन लर्निंग टेक्नॉलॉजी आणि वापरकर्त्यांकडून येणारे रिपोर्ट्स या दोन्हीचा वापर करून नको असलेले मेसेज पाठवणारे खाते बॅन करू शकते. यामध्ये त्यांना आवडणार नाही अशा प्रकारे या वापरकर्त्यांशी पद्धतशीरपणे संपर्क साधण्याची सोय असते. शिवाय, अनधिकृत किंवा ऑटोमेटेड खाती किंवा ग्रुप तयार करू नका किंवा WhatsApp च्या अनधिकृत प्रती वापरू नका.
• जी संपर्क यादी तुमची नाही ती वापरणे : परवानगी शिवाय कोणाचाही फोन नंबर शेअर करू नका किंवा बेकायदेशीर स्रोतांमधून येणार डेटा (जसे की फोन नंबर्स विकत घेणे) WhatsApp वापरकर्त्यांना संदेश पाठविणे किंवा त्यांना ग्रुप मध्ये सामील करणे हे कधीही करू नका.
• ब्रॉडकास्ट लिस्टचा अतिरिक्त वापर करणे : ब्रॉडकास्ट लिस्टमधील संदेश तेव्हाच प्राप्त होतात जेव्हा त्या वापरकर्त्याचा फोन नंबर तुमच्या ॲड्रेस बुक मध्ये समाविष्ट केलेला असतो. जर वारंवार ब्रॉडकास्ट लिस्टचा वापर केला तर अशाने तुमच्या या मेसेजेसची तक्रार केली जाण्याची संभावना असते. ज्या खात्यांची अनेकवेळा तक्रार नोंदविली गेली आहे अशी खाती आम्ही ब्लॉक करतो.
• आमच्या सेवाशर्तींचे उल्लंघन करणे : आम्ही येथे याची आठवण करून देऊ इच्छितो की चुकीची व बेकायदेशीर माहिती प्रकाशित करणे, धमकी देणारे, भीतीदायक, द्वेष आणि मत्सर असलेले आणि जातीय किंवा धार्मिक आक्षेपार्ह मजकूर संचारीत करणे आमच्या सेवाशर्तींनुसार निषिद्ध आहे. WhatsApp बरोबर तुमचे नाते सेवाशर्तींमध्ये नमूद केले आहे, आणि जर वरील मसुद्यामध्ये आणि सेवाशर्तींमध्ये काही तफावत आढळल्यास सेवाशर्तींमधील मजकूर ग्राह्य धरावा.